Peace By Aristophanes
Edited by:
F.W. Hall and W.M. Geldart
Oxford Clarendon Press, Oxford 1907
Perseus Documents Collection Table of Contents
Funded by The Annenberg CPB/Project |
|
Οικέτης Α
αἶρ' αἶρε μᾶζαν ὡς τάχιστα κανθάρῳ.
Οικέτης Β
ἰδού. δὸς αὐτῷ, τῷ κάκιστ' ἀπολουμένῳ
καὶ μήποτ' αὐτῆς μᾶζαν ἡδίω φάγοι.
Οικέτης Α
δὸς μᾶζαν ἑτέραν, ἐξ ὀνίδων πεπλασμένην.
Οικέτης Β
[5] ἰδοὺ μάλ' αὖφις. ποῦ γὰρ ἣν νῦν δὴ 'φερες;
κατέφαγεν;
Οικέτης Α
οὐ μὰ τὸν Δἴ ἀλλ' ἐξαρπάσας
ὅλην ἐνέκαψε περικυλίσας τοῖν ποδοῖν.
ἀλλ' ὡς τάχιστα τρῖβε πολλὰς καὶ πυκνάς.
Οικέτης Β
ἄνδρες κοπρολόγοι προσλάβεσθε πρὸς θεῶν,
[10] εἰ μή με βούλεσθ' ἀποπνιγέντα περιιδεῖν.
Οικέτης Α
ἑτέραν ἑτέραν δός, παιδὸς ἡταιρηκότος:
τετριμμένης γάρ φησιν ἐπιθυμεῖν.
Οικέτης Β
ἰδού.
ἑνὸς μὲν ὦνδρες ἀπολελύσθαι μοι δοκῶ:
οὐδεὶς γὰρ ἂν φαίη με μάττοντ' ἐσθίειν.
Οικέτης Α
[15] αἰβοῖ, φέρ' ἄλλην χἀτέραν μοι χἀτέραν,
καὶ τρῖβ' <ἔθ'> ἑτέρας.
Οικέτης Β
μὰ τὸν Ἀπόλλω 'γὼ μὲν οὔ:
οὐ γὰρ ἔθ' οἶός τ' εἴμ' ὑπερέχειν τῆς ἀντλίας.
Οικέτης Α
αὐτὴν ἄρ' οἴσω συλλαβὼν τὴν ἀντλίαν.
Οικέτης Β
νὴ τὸν Δί' ἐς κόρακάς γε καὶ σαυτόν γε πρός.
[20] ὑμῶν δέ γ' εἴ τις οἶδ' ἐμοὶ κατειπάτω,
πόθεν ἂν πριαίμην ῥῖνα μὴ τετρημένην.
οὐδὲν γὰρ ἔργον ἦν ἄρ' ἀθλιώτερον
ἢ κανθάρῳ μάττοντα παρέχειν ἐσθίειν.
ὗς μὲν γάρ, ὥσπερ ἂν χέσῃ τις, ἢ κύων
[25] φαύλως ἐρείδει: τοῦτο δ' ὑπὸ φρονήματος
βρενθύεταί τε καὶ φαγεῖν οὐκ ἀξιοῖ,
ἢν μὴ παραθῶ τρίψας δι' ἡμέρας ὅλης
ὥσπερ γυναικὶ γογγύλην μεμαγμένην.
ἀλλ' εἰ πέπαυται τῆς ἐδωδῆς σκέψομαι
[30] τῃδὶ παροίξας τῆς θύρας, ἵνα μή μ' ἴδῃ.
ἔρειδε, μὴ παύσαιο μηδέποτ' ἐσθίων
τέως ἕως σαυτὸν λάθοις διαρραγείς.
οἷον δὲ κύψας ὁ κατάρατος ἐσθίει,
ὥσπερ παλαιστής, παραβαλὼν τοὺς γομφίους,
[35] καὶ ταῦτα τὴν κεφαλήν τε καὶ τὼ χεῖρέ πως
ὡδὶ περιάγων, ὥσπερ οἱ τὰ σχοινία
τὰ παχέα συμβάλλοντες ἐς τὰς ὁλκάδας.
μιαρὸν τὸ χρῆμα καὶ κάκοσμον καὶ βορόν:
χὤτου ποτ' ἐστὶ δαιμόνων ἡ προσβολὴ
[40] οὐκ οἶδ'. Ἀφροδίτης μὲν γὰρ οὔ μοι φαίνεται,
οὐ μὴν Χαρίτων γε.
Οικέτης Α
τοῦ γάρ ἐστ';
Οικέτης Β
οὐκ ἔσθ' ὅπως
τοῦτ' ἔστι τὸ τέρας οὐ Διὸς καταιβάτου.
Οικέτης Α
οὐκοῦν ἂν ἤδη τῶν θεατῶν τις λέγοι
νεανίας δοκησίσοφος, τὸ δὲ πρᾶγμα τί;
[45] ὁ κάνθαρος δὲ πρὸς τί; κᾆτ' αὐτῷ γ' ἀνὴρ
Ἰωνικός τίς φησι παρακαθήμενος:
δοκέω μέν, ἐς Κλέωνα τοῦτ' αἰνίσσεται,
ὡς κεῖνος ἀναιδέως τὴν σπατίλην ἐσθίει.
Οικέτης Β
ἀλλ' εἰσιὼν τῷ κανθάρῳ δώσω πιεῖν.
|
|