P.
Heus, Abrahame.
A.
Hem, praeceptor.
P.
Pone libros; iam satis toto die studuisti: para te, ut eamus ambulatum.
A.
Nonne a coena praestaret?
P.
Salubrior est ante cibum exercitatio corporis.
A.
Memini ex te audire.
P.
Narra Socratis dictum in eam sententiam.
A.
Cum Socrates usque ad vesperam contentius ambularet, interrogatus
quare id faceret, respondit, Se, quo melius coenaret, obsonare
famem ambulando.
P.
Probe meministi: quis auctor?
A.
Cicero: sed quo prodibimus, praeceptor?
P.
Extra urbem.
A.
Mutabone calceos?
P.
Muta, ne illos novos pulvere conspergas: sume etiam umbellam, ne
solis ardor infuscet tibi faciem.
A.
Iam paratus adsum.
P.
Nunc sane prodeamus.
A.
Vocabone ex vicinia unum aut alterum comitem?
P.
Recte admones; sic enim iucundior erit deambulatio: nam per viam
sermones inter vos conseretis, et in umbra colludetis alicubi.
A.
Sic etiam excitabitur cibi appetentia.
P.
Ego lento gradu praecedam; ubi nactus eris comites, vos me per portam
Ripariam sequimini.
A.
Nos igitur illic exspectabis?
P.
Certo.
A.
Quid si nullos invenero?
P.
Nihilominus sequere me: audistine?
A.
Audivi, praeceptor.
[ 13 ]
